ಸುದ್ದಿ ಕನ್ನಡ ವಾರ್ತೆ
ಶಿರಸಿ: ತಾಲೂಕಿನ ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನದಲ್ಲಿ ಶ್ರೀಮದ್ ಗಂಗಾಧರೇಂದ್ರ ಸರಸ್ವತೀ ಸ್ವಾಮಿಗಳವರ ಹಾಗೂ ಶ್ರೀಮದ್ ಆನಂದಬೋಧೇಂದ್ರ ಸರಸ್ವತೀ ಸ್ವಾಮಿಗಳವರ ಸಾನ್ನಿಧ್ಯದಲ್ಲಿ ಭಾನುವಾರದಿಂದ ಶರನ್ನವರಾತ್ರಿ ಉತ್ಸವ ವಿಜೃಂಭಣೆಯಿಂದ ಆರಂಭಗೊಂಡಿದೆ.
ಉತ್ಸವದ ಅಂಗವಾಗಿ ಗಣಪತಿ ಪೂಜೆ, ಪುಣ್ಯಾಹ, ಮಹಾಸಂಕಲ್ಪ, ಋತ್ವಿಕ್ವರಣ ಸೇರಿದಂತೆ ವಿವಿಧ ಧಾರ್ಮಿಕ ವಿಧಿವಿಧಾನಗಳು ನಡೆದವು. ಶ್ರೀಚಕ್ರಾರ್ಚನೆ,ಶ್ರೀಮದ್
ದೇವೀಭಾಗವತ, ಚಂಡೀಸಪ್ತಶತಿ, ಋಗ್ವೇದ, ಯಜುರ್ವೇದ, ಸಾಮವೇದ ಹಾಗೂ ಅಧ್ಯಾತ್ಮ ರಾಮಾಯಣ ಪಾರಾಯಣಗಳು ಮಹಾ ಸಂಕಲ್ಪದೊಂದಿಗೆ ಆರಂಭವಾದವು.
ಮಂಜುನಾಥ ಹೆಗಡೆ ಮಣಿಗಾರ ದಂಪತಿಗಳು ಯಜಮಾನತ್ವ ವಹಿಸಿಕೊಂಡರು.
ಮಹಾನ್ಯಾಸಪೂರ್ವಕ ಶತರುದ್ರಾಭಿಷೇಕ, ಶ್ರೀಸೂಕ್ತ, ಪುರುಷಸೂಕ್ತ, ದುರ್ಗಾಸೂಕ್ತ, ದೇವೀಸೂಕ್ತ ಪಠಣ ಹಾಗೂ ನವಗ್ರಹ, ಬ್ರಹ್ಮಾಸ್ತ್ರ ಜಪಗಳು ನವರಾತ್ರಿಯುದ್ದಕ್ಕೂ ನಡೆಯಲಿವೆ.
ಪ್ರತಿ ದಿನ ಮಧ್ಯಾಹ್ನ ದುರ್ಗಾಪೂಜೆ, ಮಂಗಳಾರತಿ ಹಾಗೂ ದೇವೀಭಾಗವತ ಪುರಾಣ ಪ್ರವಚನ ಜರುಗಲಿದ್ದು, ರಾತ್ರಿ ದುರ್ಗಾಪೂಜೆ, ಮಂಗಳಾರತಿ ಮತ್ತು ತೀರ್ಥಪ್ರಸಾದ ವಿತರಣೆ ಕೂಡ ಇರಲಿದೆ. ಉತ್ಸವದ ಅವಧಿಯಲ್ಲಿ ಉಭಯ ಶ್ರೀಗಳು ಬ್ರಾಹ್ಮೀ ಮುಹೂರ್ತ ಹಾಗೂ ಪ್ರದೋಷ ಕಾಲದಲ್ಲಿ ಶ್ರೀಚಕ್ರಾರ್ಚನೆ ನೆರವೇರಿಸಲಿದ್ದಾರೆ.
ಶರನ್ನವರಾತ್ರಿ ಅಂಗವಾಗಿ ಸ್ವರ್ಣವಲ್ಲಿ ಮಠದ ಸುಧರ್ಮಾ ಸಭಾಭವನದಲ್ಲಿ 20ರವರೆಗೆ ಪ್ರತಿದಿನ ಸಂಜೆ 6ರಿಂದ ರಾತ್ರಿ 8.30ರವರೆಗೆ ಸಾಂಸ್ಕೃತಿಕ ಉತ್ಸವ ನಡೆಯಲಿದೆ.
