ಸುದ್ದಿ ಕನ್ನಡ ವಾರ್ತೆ
ಜೋಯಿಡಾ:ತಾಲೂಕಿನ ಹನೋಲಿ ಕ್ರಾಸ್ – ಚಾಪೇರ ಕ್ರಾಸ್ ಮಧ್ಯೆ, ರಸ್ತೆಯ ಪಕ್ಕದಲ್ಲಿ ಕಾಡುಕೋಣಗಳ ಹಿಂಡು,ದನಗಳಂತೆ ಸಾಲಾಗಿ ಮೇಯುತ್ತಿರುವ ಅಪರೂಪದ ದೃಶ್ಯ ಸ್ಥಳೀಯರ ಮತ್ತು ಪ್ರವಾಸಿಗರ ಗಮನ ಸೆಳೆದಿದೆ.
ಕಾಡಿನಿಂದ ನಾಡಿನತ್ತ ಮುಖ ಮಾಡಿರುವ ಕಾಡುಕೋಣಗಳು, ಯಾವುದೇ ಭಯವಿಲ್ಲದೇ ರಸ್ತೆ ಬದಿಯಲ್ಲಿ ಗಂಟೆಗಟ್ಟಲೆ ಮೇಯಲು ಬೀಡು ಬಿಟ್ಟಿದ್ದವು. ಸಾಮಾನ್ಯವಾಗಿ ಜನರನ್ನು ಕಂಡರೆ ಓಡಿಹೋಗುವ ಈ ವನ್ಯಜೀವಿಗಳು, ಇಲ್ಲಿ ಮಾತ್ರ ಸಾಕು ಪ್ರಾಣಿಗಳಂತೆ ಶಾಂತವಾಗಿ ನಿಂತಿದ್ದನ್ನು ಕಂಡು ಸಾರ್ವಜನಿಕರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
ರಸ್ತೆಯಲ್ಲಿ ಸಂಚರಿಸುತ್ತಿದ್ದ ವಾಹನ ಸವಾರರು ತಮ್ಮ ಮೊಬೈಲ್ಗಳಲ್ಲಿ ಈ ಅಪರೂಪದ ದೃಶ್ಯವನ್ನು ಸೆರೆಹಿಡಿದಿದ್ದಾರೆ. ಆದರೆ, ಮುಖ್ಯ ರಸ್ತೆಯ ಅಕ್ಕಪಕ್ಕದಲ್ಲೇ ವನ್ಯಜೀವಿಗಳು ಹೀಗೆ ಬೀಡು ಬಿಡುತ್ತಿರುವುದರಿಂದ ರಾತ್ರಿ ವೇಳೆಯ ಸಂಚಾರಕ್ಕೆ ಸವಾರರು ಕೊಂಚ ಆತಂಕ ವ್ಯಕ್ತಪಡಿಸಿದ್ದು, ಅರಣ್ಯ ಇಲಾಖೆ ಸೂಕ್ತ ನಿಗಾ ವಹಿಸಬೇಕಾಗಿ ವಿನಂತಿಸಿದ್ದಾರೆ.
