ಸುದ್ದಿ ಕನ್ನಡ ವಾರ್ತೆ
”ಕಲೆಯೇ ಕಾಯಕವಾಗಿ, ಕಾಯಕವೇ ಕಲೆಯಾಗಿ ಬಾಳಿ ಬೆಳಗಿದ ಮಹಾ ಚೇತನಕ್ಕೊಂದು ಪ್ರಣಾಮ.”
ಯಕ್ಷಗಾನ ರಂಗದ ಅಪ್ರತಿಮ ಕಲಾವಿದರು , ಅಗ್ರಗಣ್ಯ ಅರ್ಥಧಾರಿಗಳು ಹಾಗೂ ಪ್ರಗತಿಪರ ಕೃಷಿಕರಾಗಿದ್ದ ಸಿದ್ದಾಪುರ ತಾಲೂಕಿನ ಹುಕ್ಲಮಕ್ಕಿಯ ಶ್ರೀ ಕಮಲಾಕರ್ ಹೆಗಡೆ ಅವರು ಇಹಲೋಕ ತ್ಯಜಿಸಿರುವುದು ಇಡೀ ಕಲಾ ಲೋಕಕ್ಕೆ ತುಂಬಲಾರದ ನಷ್ಟವನ್ನುಂಟು ಮಾಡಿದೆ.
ತಾಯಿ ಸರಸ್ವತಿಯ ವರಪುತ್ರರಾಗಿದ್ದ ಅವರು ಯಕ್ಷಗಾನ ಮತ್ತು ಕೃಷಿ ಎರಡನ್ನೂ ಸಮಾನವಾಗಿ ಪ್ರೀತಿಸಿ, ಎರಡರಲ್ಲೂ ಯಶಸ್ಸಿನ ಶಿಖರ ಏರಿದ ಅಪರೂಪದ ವ್ಯಕ್ತಿತ್ವವಾಗಿದ್ದರು.
ಯಕ್ಷಗಾನ ರಂಗಸ್ಥಳದಲ್ಲಿ ತಮ್ಮದೇ ಆದ ವಿಶಿಷ್ಟ ಶೈಲಿಯ ನಟನೆಯ ಮೂಲಕ ಪ್ರೇಕ್ಷಕರ ಮನ ಗೆದ್ದಿದ್ದ ಶ್ರೀಯುತರು, ಕೇವಲ ವೇಷಧಾರಿಯಾಗಿ ಮಾತ್ರವಲ್ಲದೆ ತಾಳಮದ್ದಲೆಯ ಮುಮ್ಮೇಳದಲ್ಲೂ ತಮ್ಮ ಪ್ರೌಢ ವಾಕ್ಚಾತುರ್ಯ ಮತ್ತು ಪಾಂಡಿತ್ಯಪೂರ್ಣ ಅರ್ಥಗಾರಿಕೆಯಿಂದ ಹೆಸರುವಾಸಿಯಾಗಿದ್ದರು.
ಯುವ ಪ್ರತಿಭೆಗಳಿಗೆ ಯಕ್ಷಗಾನದ ಹೆಜ್ಜೆಗಳನ್ನು ಕಲಿಸಿ, ಕಲೆಯ ಸಂಸ್ಕಾರ ನೀಡಿ, ಯಕ್ಷರಂಗಕ್ಕೆ ಗುರು ಸ್ಥಾನದಲ್ಲಿ ನಿಂತು ದಾರಿದೀಪವಾಗಿದ್ದ ಕೀರ್ತಿ ಇವರದ್ದಾಗಿದೆ. ಅವರ ಈ ಸುದೀರ್ಘ ಹಾಗೂ ನಿಷ್ಕಲ್ಮಶ ಕಲಾ ಸೇವೆಯನ್ನು ಗುರುತಿಸಿ ನಾಡಿನಾದ್ಯಂತ ಅನೇಕ ಪ್ರತಿಷ್ಠಿತ ಪ್ರಶಸ್ತಿ ಹಾಗೂ ಪುರಸ್ಕಾರಗಳು ಇವರನ್ನು ಅರಸಿ ಬಂದಿದ್ದವು.
ಕೇವಲ ಕಲಾಕ್ಷೇತ್ರ ಮಾತ್ರವಲ್ಲದೆ, ಕೃಷಿ ರಂಗದಲ್ಲೂ ಹೊಸ ಮನ್ವಂತರ ಸೃಷ್ಟಿಸಿದ್ದ ಶ್ರೀಯುತರ ಅಗಲಿಕೆಯಿಂದ ಮಲೆನಾಡಿನ ಕಲಾ ಸಾಮ್ರಾಜ್ಯ ಒಬ್ಬ ಹಿರಿಯ ಮಾರ್ಗದರ್ಶಕನನ್ನು ಕಳೆದುಕೊಂಡು ಅನಾಥವಾಗಿದೆ.
ಭಗವಂತನು ಮೃತರ ಆತ್ಮಕ್ಕೆ ಚಿರಶಾಂತಿಯನ್ನು ಕರುಣಿಸಲಿ, ಹಾಗೂ ಅವರ ಅಗಲಿಕೆಯ ದುಃಖವನ್ನು ಭರಿಸುವ ಶಕ್ತಿಯನ್ನು ಅವರ ಕುಟುಂಬ ವರ್ಗದವರಿಗೂ ಮತ್ತು ಅಸಂಖ್ಯಾತ ಅಭಿಮಾನಿ ಬಳಗಕ್ಕೂ ನೀಡಲಿ ಎಂದು ಪ್ರಾರ್ಥಿಸುತ್ತೇನೆ.
ಓಂ ಶಾಂತಿಃ.
ವಿಶ್ವೇಶ್ವರ ಹೆಗಡೆ ಕಾಗೇರಿ ಸಂಸದರು ಉತ್ತರ ಕನ್ನಡ.
