ಸುದ್ಧಿಕನ್ನಡ ವಾರ್ತೆ
Goa: ಗೋವಾ ರಾಜ್ಯ ಅರಣ್ಯ ಇಲಾಖೆಯ ಅನುಮತಿಯಿಲ್ಲದೆ ದೂಧಸಾಗರ (Dhoodh Sagar)ಜಲಪಾತಕ್ಕೆ ತೆರಳುವ ಪ್ರವಾಸಿಗರಿಗೆ ಗೋವಾ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ (GTDC) ಕೌಂಟರ್ ತೆರೆದಿದೆ. ಪ್ರವಾಸಿಗರಿಗೆ ಸೇವೆ ನೀಡಲು ಆರಂಭಿಸಿರುವ ವೆಬ್ ಸೈಟ್ ದುರ್ಬಳಕೆಯಿಂದ ಸುಮಾರು 8 ಕೋಟಿ ರೂ.ಗಳ ಹಗರಣ ಬಯಲಾಗಿದೆ ಎನ್ನಲಾಗಿದ್ದು, ಹೀಗಾಗಿ ವೆಬ್‍ಸೈಟ್ ಅನ್ನು ಸಂಸ್ಥೆಗೆ ವಾಪಸ್ ತೆಗೆದುಕೊಳ್ಳುವ ಪ್ರಕ್ರಿಯೆ ಆರಂಭಿಸಲು ಗೋವಾದ ಕುಳೆಯಲ್ಲಿ ನಡೆದ ದೂಧಸಾಗರ ಟೂರ್ ಆಪರೇಟರ್ ಜೀಪ್ ಮಾಲೀಕರ ಸಂಘದ ಸಾಮಾನ್ಯ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಯಿತು.
ಗೋವಾ ದೂಧಸಾಗರ ಪ್ರವಾಸಿ ಜೀಪು ಮಾಲೀಕರ ಸಂಘದ ಅಧ್ಯಕ್ಷ ನೀಲೇಶ್ ವಾರಿಪ ಅಧ್ಯಕ್ಷತೆಯಲ್ಲಿ ಸಾಮಾನ್ಯ ಸಭೆ ನಡೆಯಿತು. ಈ ಸಭೆಯಲ್ಲಿ 400 ಕ್ಕೂ ಹೆಚ್ಚು ಜೀಪ್ ಮಾಲೀಕರು ಉಪಸ್ಥಿತರಿದ್ದರು. ಸಂಸ್ಥೆಯ ವೆಬ್‍ಸೈಟ್ ಬಳಸಿಕೊಂಡು ಉತ್ತಮ ಸೌಲಭ್ಯಗಳನ್ನು ಒದಗಿಸಲು ಫೋಂಡಾದಲ್ಲಿರುವ ನೀತಾ ಟ್ರಾವೆಲ್ಸ್ ಎಂಬ ಸಂಸ್ಥೆಯೊಂದಿಗೆ ಸಂಸ್ಥೆಯ ಮಾಜಿ ಅಧ್ಯಕ್ಷ ಮತ್ತು ಮಾಜಿ ಕಾರ್ಯದರ್ಶಿ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಅದಕ್ಕಾಗಿ ಸಂಘಟನೆಯ ಇತರೆ ಪದಾಧಿಕಾರಿಗಳನ್ನು ಮಾಜಿ ಅಧ್ಯಕ್ಷ ಹಾಗೂ ಮಾಜಿ ಕಾರ್ಯದರ್ಶಿ ವಿಶ್ವಾಸಕ್ಕೆ ತೆಗೆದುಕೊಂಡಿರಲಿಲ್ಲ. ಆ ವೆಬ್‍ಸೈಟ್ ಅನ್ನು ಬಳಸಲು ನೀತಾ ಟ್ರಾವೆಲ್ ಗೋವಾ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿಯೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಆದ್ದರಿಂದ, ಜನವರಿ 2024 ರಿಂದ, ಜಲಪಾತಕ್ಕೆ ಹೋಗಲು ಪ್ರವಾಸಿಗರಿಗೆ 275 ರೂ. ಹೆಚ್ಚಿನ ಶುಲ್ಕವನ್ನು ಪಡೆಯಲು ಆರಂಭಿಸಲಾಗಿತ್ತು. ಈಗಿರುವ ಸಂಸ್ಥೆಯ ಪದಾಧಿಕಾರಿಗಳು ಪಡೆದ ಮಾಹಿತಿ ಪ್ರಕಾರ 8 ಕೋಟಿ ರೂಗಳ ಪೈಕಿ ಕೇವಲ 34,30,440 ರೂ. ಜಮಾ ಮಾಡಲಾಗಿತ್ತು. ಉಳಿದ ಮೊತ್ತಕ್ಕೆ ಲೆಕ್ಕ ನೀಡದ ಕಾರಣ ಹಗರಣ ಬಯಲಿಗೆ ಬಂದಿರುವುದು ಈ ಸಭೆಯಲ್ಲಿ ಚರ್ಚೆಯಾಯಿತು. ಆಗ ನೀತಾ ಟ್ರಾವೆಲ್ಸ್ ಸಂಸ್ಥೆಯಿಂದ ವೆಬ್‍ಸೈಟ್ ದುರುಪಯೋಗದ ಬಗ್ಗೆ ಸಂಘದ ಮಾಜಿ ಅಧ್ಯಕ್ಷ ಅಶೋಕ್ ಖಂಡೇಪಾರ್ಕರ್ ಮತ್ತು ಮಾಜಿ ಕಾರ್ಯದರ್ಶಿ ಸತ್ಯವಾನ್ ನಾಯಕ್ ಅವರಿಂದ ಲಿಖಿತ ಪತ್ರ ತೆಗೆದುಕೊಳ್ಳಲು ನಿರ್ಧರಿಸಲಾಯಿತು. ಅದರಂತೆ ಮಾಜಿ ಅಧ್ಯಕ್ಷ ಹಾಗೂ ಮಾಜಿ ಕಾರ್ಯದರ್ಶಿ ಲಿಖಿತ ಪತ್ರವನ್ನು ಅಧ್ಯಕ್ಷ ವಾರಿಪ ಅವರಿಗೆ ನೀಡಿದರು.
ಪ್ರವಾಸಿಗರ ಸಂಖ್ಯೆಯಲ್ಲಿ ಭಾರಿ ಕುಸಿತ
ಅರಣ್ಯ ಇಲಾಖೆಯ ಅನುಮತಿ ಪಡೆಯದೆ ಗೋವಾ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿ ಆರಂಭಿಸಿರುವ ಕೌಂಟರ್ ಆರಂಭಿಸಿ ಪ್ರವಾಸಿಗರಿಂದ ಹೆಚ್ಚಿನ ಹಣ ಪಡೆಯುತ್ತಿರುವುದು ಪ್ರವಾಸಿಗರ ಸಂಖ್ಯೆಯಲ್ಲಿ ತೀವ್ರ ಇಳಿಕೆಗೆ ಕಾರಣವಾಗಿದೆ ಎಂದು ಅಧ್ಯಕ್ಷ ವಾರಿಪ್ ಹೇಳಿದರು. ಕೌಂಟರ್ ತೆರೆದಾಗ ಅಂದಾಜು 8 ಕೋಟಿ ಹಗರಣ ಬೆಳಕಿಗೆ ಬಂದಿದೆ. ಈ ವಿಷಯವನ್ನು ಮುಖ್ಯಮಂತ್ರಿಗಳ ಗಮನಕ್ಕೆ ತರಲಾಗಿದೆ. ಜೀಪ್ ಮಾಲೀಕರು ಕೌಂಟರ್ ಮುಚ್ಚುವಂತೆ ಆಗ್ರಹಿಸಿದ್ದಾರೆ. ಇದೇ ವೇಳೆ ಮುಖ್ಯಮಂತ್ರಿಗಳು ಅಗತ್ಯ ನಿರ್ಧಾರ ಕೈಗೊಂಡು ಪ್ರವಾಸೋದ್ಯಮಕ್ಕೆ ಚಾಲನೆ ನೀಡುತ್ತಾರೆ ಎಂಬ ನಂಬಿಕೆಯನ್ನು ವಾರಿಪ್ ವ್ಯಕ್ತಪಡಿಸಿದರು.
