ಸುದ್ದಿ ಕನ್ನಡ ವಾರ್ತೆ
ಭಟ್ಕಳ: ರೈಲು ಪ್ರಯಾಣಿಕರ ಅಸಹಾಯಕತೆಯನ್ನು ಬಂಡವಾಳ ಮಾಡಿಕೊಂಡು ವಂಚಿಸುವ ಜಾಲವೊಂದು ಸಕ್ರಿಯವಾಗಿರುವುದು ಮತ್ತೊಮ್ಮೆ ಸಾಬೀತಾಗಿದೆ. ಸಹಪ್ರಯಾಣಿಕರು ನೀಡಿದ ಪ್ರಸಾದ ಅಥವಾ ತಿಂಡಿ-ತಿನಿಸುಗಳನ್ನು ನಂಬಿ ಸೇವಿಸುವ ಮುನ್ನ ನೂರು ಬಾರಿ ಯೋಚಿಸಬೇಕು ಎಂಬುದಕ್ಕೆ ತಾಲೂಕಿನ ಮುರ್ಡೇಶ್ವರದಲ್ಲಿ ನಡೆದ ಈ ಘಟನೆಯೇ ಸಾಕ್ಷಿ. ಅಪರಿಚಿತರು ನೀಡಿದ ಲಾಡು ತಿಂದ ವೃದ್ಧ ವ್ಯಾಪಾರಿಯೊಬ್ಬರು ಬರೋಬ್ಬರಿ ರೂ.4.75 ಲಕ್ಷ ನಗದು ಹಣ ಕಳೆದುಕೊಂಡಿರುವ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ಮುರುಡೇಶ್ವರದ ನ್ಯಾಷನಲ್ ಕಾಲೋನಿ ನಿವಾಸಿಯಾಗಿರುವ 60 ವರ್ಷದ ವ್ಯಾಪಾರಿ ಮಹಮ್ಮದ್ ಖಾಸೀಮ್ ಹಸನ್ ಬಾಬು ಈ ವಂಚನೆಗೆ ಒಳಗಾದ ದುರ್ದೈವಿ. ಸಂತ್ರಸ್ತರ ದೂರಿನನ್ವಯ ಶೇಖ್ ರಿಯಾಜ್ ಗಿಡ್ಡಣ್ಣನವರ ಹಾಗೂ ಆತನ ವಿಚ್ಛೇದಿತ ಪತ್ನಿ ತಾಸೀನ್ ಎಂಬ ಆರೋಪಿಗಳ ವಿರುದ್ಧ ಮುರುಡೇಶ್ವರ ಪೊಲೀಸ್ ಠಾಣೆಯಲ್ಲಿ ಗಂಭೀರ ಸ್ವರೂಪದ ಮೊಕದ್ದಮೆ ದಾಖಲಾಗಿದೆ.
ಪೊಲೀಸ್ ಮೂಲಗಳ ಪ್ರಕಾರ, ಮೇ 3ರಂದು ರಾತ್ರಿ ಭಟ್ಕಳದಿಂದ ದೆಹಲಿಗೆ ತೆರಳಲು ಮಹಮ್ಮದ್ ಖಾಸೀಮ್ ಅವರು ಮಂಗಳಾ ಎಕ್ಸ್ಪ್ರೆಸ್ ರೈಲು ಹತ್ತಿದ್ದರು. ಈ ವೇಳೆ ಅದೇ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ಆರೋಪಿ ಜೋಡಿಯು ಯೋಜಿತ ಸಂಚಿನಂತೆ ಖಾಸೀಮ್ ಅವರೊಂದಿಗೆ ಸ್ನೇಹ ಬೆಳೆಸಿದೆ. ತದನಂತರ ತಾವೇ ತಯಾರಿಸಿಕೊಂಡು ಬಂದಿದ್ದ, ತೀವ್ರ ಸ್ವರೂಪದ ನಿದ್ದೆ ಮಾತ್ರೆ ಮಿಶ್ರಿತ ವಿಶೇಷ ಲಾಡನ್ನು ಅವರಿಗೆ ತಿನ್ನಲು ನೀಡಿದ್ದಾರೆ. ಸಹಪ್ರಯಾಣಿಕರ ನಡವಳಿಕೆಯನ್ನು ನಂಬಿದ ವೃದ್ಧರು ಲಾಡು ಸೇವಿಸಿದ ಕೆಲವೇ ನಿಮಿಷಗಳಲ್ಲಿ ಪ್ರಜ್ಞೆ ತಪ್ಪಿ ಗಾಢ ನಿದ್ದೆಗೆ ಜಾರಿದ್ದಾರೆ.
ವೃದ್ಧ ಪ್ರಯಾಣಿಕರು ಪ್ರಜ್ಞೆ ಕಳೆದುಕೊಳ್ಳುತ್ತಿದ್ದಂತೆ ತಮ್ಮ ಅಸಲಿ ಕಾರ್ಯಾಚರಣೆ ಆರಂಭಿಸಿದ ಆರೋಪಿಗಳು, ಅವರ ಬ್ಯಾಗ್ನಲ್ಲಿದ್ದ ರೂ.4,75,000 ನಗದು ಹಣವನ್ನು ಕಳವು ಮಾಡಿದ್ದಾರೆ. ಕೃತ್ಯ ಎಸಗಿದ ಬೆನ್ನಲ್ಲೇ ಆರೋಪಿ ಮಹಿಳೆ ತಾಸೀನ್ ಕಾರವಾರ ರೈಲ್ವೇ ನಿಲ್ದಾಣದಲ್ಲಿ ಅತ್ಯಂತ ಚಾಣಾಕ್ಷತನದಿಂದ ರೈಲಿನಿಂದ ಇಳಿದು ತಲೆಮರೆಸಿಕೊಂಡಿದ್ದಾಳೆ.
ಲಾಡಿನಲ್ಲಿದ್ದ ಮಾದಕ ವಸ್ತುವಿನ ತೀವ್ರತೆಯಿಂದಾಗಿ ತೀವ್ರ ಅಸ್ವಸ್ಥರಾಗಿದ್ದ ಖಾಸೀಮ್ ಅವರಿಗೆ ಸಂಪೂರ್ಣವಾಗಿ ಪ್ರಜ್ಞೆ ಮರಳಿ, ಪರಿಸ್ಥಿತಿಯ ಗಂಭೀರತೆ ಅರ್ಥವಾಗಲು ಕೆಲವು ದಿನಗಳೇ ಬೇಕಾಯಿತು. ಕೊನೆಗೂ ಚೇತರಿಸಿಕೊಂಡ ಅವರು ಮೇ 23ರ ಶನಿವಾರ ರಾತ್ರಿ ಮುರುಡೇಶ್ವರ ಪೊಲೀಸ್ ಠಾಣೆಗೆ ಧಾವಿಸಿ, ತಮಗೆ ವಿಷಪೂರಿತ ಆಹಾರ ನೀಡಿ ವಂಚಿಸಿದ ಕಿಲಾಡಿಗಳ ವಿರುದ್ಧ ಲಿಖಿತ ದೂರು ಸಲ್ಲಿಸಿದ್ದಾರೆ. ಪ್ರಕರಣವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿರುವ ಮುರುಡೇಶ್ವರ ಪೊಲೀಸರು ಆರೋಪಿಗಳ ವಿರುದ್ದ ದೂರು ದಾಖಲಿಸಿಕೊಂಡಿದ್ದು, ಪ್ರಸ್ತುತ ತಲೆಮರೆಸಿಕೊಂಡಿರುವ ಇಬ್ಬರು ಆರೋಪಿಗಳ ಪತ್ತೆಗಾಗಿ ತೀವ್ರ ಜಾಲ ಬೀಸಿದ್ದಾರೆ.
ರೈಲು ಹಾಗೂ ಬಸ್ ಪ್ರಯಾಣದ ಅವಧಿಯಲ್ಲಿ ಅಪರಿಚಿತರು ನೀಡುವ ಯಾವುದೇ ತಿಂಡಿ, ಪಾನೀಯ ಅಥವಾ ಪ್ರಸಾದವನ್ನು ಸ್ವೀಕರಿಸದಂತೆ ಮತ್ತು ತಮ್ಮ ಅಮೂಲ್ಯ ವಸ್ತುಗಳ ಬಗ್ಗೆ ಸದಾ ಜಾಗರೂಕರಾಗಿರುವಂತೆ ಸಾರ್ವಜನಿಕರಲ್ಲಿ ಪೊಲೀಸ್ ಇಲಾಖೆ ಮನವಿ ಮಾಡಿದೆ.
