ಸುದ್ಧಿಕನ್ನಡ ವಾರ್ತೆ
ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ಮೂರನೇ ಅಧಿಕಾರ ಅವಧಿ ಶೀಘ್ರದಲ್ಲೇ 100 ದಿನಗಳನ್ನು ಪೂರೈಸಲಿದೆ. ಅದಕ್ಕೂ ಮುನ್ನ ಮೋದಿ ಸಂಪುಟ ತನ್ನ ಪ್ರಣಾಳಿಕೆಯಲ್ಲಿನ ಮಹತ್ವದ ವಿಷಯಕ್ಕೆ ಅನುಮೋದನೆ ನೀಡಿದೆ. ಒಂದು ರಾಷ್ಟ್ರ, ಒಂದು ಚುನಾವಣೆ ಪ್ರಸ್ತಾವನೆಗೆ ಮೋದಿ ಸಂಪುಟ ಅನುಮೋದನೆ ನೀಡಿದೆ. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮಂಗಳವಾರ ಈ ಕುರಿತು ಹೇಳಿಕೆ ನೀಡಿದ್ದರು. ಅದರ ನಂತರ ಎರಡನೇ ದಿನವಾದ ಬುಧವಾರ ಪ್ರಸ್ತಾವನೆಗೆ ಅನುಮೋದನೆ ನೀಡಲಾಗಿದೆ. ಹೀಗಾಗಿ ಈ ಕಾನೂನನ್ನು ಯಾವಾಗ ಜಾರಿಗೆ ತರಲಾಗುತ್ತದೆ ಎಂಬುದಕ್ಕೆ ಈಗ ದೇಶವೇ ಗಮನ ಹರಿಸುತ್ತಿದೆ.
ಕಳೆದ ಹಲವು ದಿನಗಳಿಂದ ದೇಶಾದ್ಯಂತ ಒಂದು ದೇಶ ಒಂದು ಚುನಾವಣೆ ಎಂಬ ಚರ್ಚೆ ನಡೆಯುತ್ತಿತ್ತು. ಇದು ಎನ್‍ಡಿಎ ಪ್ರಣಾಳಿಕೆಯ ವಿಷಯವಾಗಿತ್ತು. ಹೀಗಾಗಿ ಸರ್ಕಾರ ಮಾಜಿ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರ ಸಮಿತಿಯನ್ನು ನೇಮಿಸಿತ್ತು. ಪ್ರಧಾನಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ಸಮಿತಿ ನೀಡಿದ ವರದಿಗೆ ಅನುಮೋದನೆ ನೀಡಲಾಗಿದೆ. ಒಂದು ದೇಶ, ಒಂದು ಚುನಾವಣೆ ನೀತಿಯ ಬಗ್ಗೆ ಸಮಿತಿಯು ಅನುಕೂಲಕರ ವರದಿಯನ್ನು ನೀಡಿತ್ತು.
ಒಂದು ದೇಶ, ಒಂದು ಚುನಾವಣೆ ಮೊದಲು ಸಂಸತ್ತಿನಲ್ಲಿ ಮಸೂದೆ ತಂದು ಅಂಗೀಕರಿಸಬೇಕು. ಏಕೆಂದರೆ, ಇದರಲ್ಲಿ ಸಂವಿಧಾನದಲ್ಲಿರುವ ನಿಯಮಗಳಿಗೆ ತಿದ್ದುಪಡಿ ತರಬೇಕಿದೆ. ಇದಕ್ಕೆ ಮೂರನೇ ಒಂದು ಭಾಗದಷ್ಟು ಸದಸ್ಯರ ಅನುಮೋದನೆ ಬೇಕಾಗುತ್ತದೆ. ಲೋಕಸಭೆಯಲ್ಲಿ ಈ ಮಸೂದೆಯನ್ನು ಅಂಗೀಕರಿಸಲು ಕನಿಷ್ಠ 362 ಸದಸ್ಯರು ಮತ್ತು ರಾಜ್ಯಸಭೆಯ 163 ಸದಸ್ಯರ ಅನುಮೋದನೆ ಅಗತ್ಯವಿದೆ. ಮಸೂದೆಯನ್ನು ಸಂಸತ್ತು ಅಂಗೀಕರಿಸಿದ ನಂತರ, ಕನಿಷ್ಠ 15 ರಾಜ್ಯಗಳ ಶಾಸಕಾಂಗಗಳು ಅದನ್ನು ಅನುಮೋದಿಸಬೇಕಾಗುತ್ತದೆ. ರಾಷ್ಟ್ರಪತಿಗಳ ಅಂಕಿತದ ನಂತರ ಮಸೂದೆ ಕಾನೂನಾಗಲಿದೆ.
32 ಪಕ್ಷಗಳು ಬೆಂಬಲಿಸಿದರೆ, 15 ಪಕ್ಷಗಳು ವಿರೋಧಿಸುತ್ತವೆ
– ಮಾಜಿ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ನೇತೃತ್ವದ ಸಮಿತಿಯು 62 ರಾಜಕೀಯ ಪಕ್ಷಗಳನ್ನು ಸಂಪರ್ಕಿಸಿದೆ. ಅದರಲ್ಲಿ 32 ಪಕ್ಷಗಳು ಒಂದು ದೇಶ, ಒಂದು ಚುನಾವಣೆಯನ್ನು ಬೆಂಬಲಿಸಿವೆ. 15 ಪಕ್ಷಗಳು ವಿರೋಧಿಸಿದ್ದವು. 15 ಪಕ್ಷಗಳು ತಟಸ್ಥ ನಿಲುವು ತಳೆದಿವೆ.
– ಕೇಂದ್ರದಲ್ಲಿ ಎನ್‍ಡಿಎ ಸರ್ಕಾರದಲ್ಲಿರುವ ಬಿಜೆಪಿಯನ್ನು ಹೊರತುಪಡಿಸಿ, ನಿತೀಶ್ ಕುಮಾರ್ ಅವರ ಜೆಡಿಯು ಮತ್ತು ಚಿರಾಗ್ ಪಾಸ್ವಾನ್ ಅವರ ಎಲ್‍ಜೆಪಿ (ಆರ್) ಒಂದೇ ದೇಶ, ಒಂದು ಚುನಾವಣೆಯನ್ನು ಒಪ್ಪಿಕೊಂಡಿವೆ. ಆದರೆ, ಚಂದ್ರಬಾಬು ನಾಯ್ಡು ಅವರ ಟಿಡಿಪಿ ಇದಕ್ಕೆ ಯಾವುದೇ ಉತ್ತರ ನೀಡಿಲ್ಲ.
– ಕಾಂಗ್ರೆಸ್, ಸಮಾಜವಾದಿ ಪಕ್ಷ, ಆಮ್ ಆದ್ಮಿ ಪಕ್ಷ, ಸಿಪಿಎಂ ಮತ್ತು ಬಿಎಸ್ಪಿ ಸೇರಿದಂತೆ 15 ಪಕ್ಷಗಳು ವಿರೋಧಿಸಿದ್ದವು.
– ಜಾಖರ್ಂಡ್ ಮುಕ್ತಿ ಮೋರ್ಚಾ, ಟಿಡಿಪಿ, ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ ಸೇರಿದಂತೆ 15 ಪಕ್ಷಗಳು ಯಾವುದೇ ಉತ್ತರ ನೀಡಿಲ್ಲ.
1967ರ ನಂತರ ಸಂಪ್ರದಾಯ ಮುರಿದುಬಿತ್ತು
ಸ್ವಾತಂತ್ರ್ಯದ ನಂತರ, 1952, 1957, 1962 ಮತ್ತು 1967 ರಲ್ಲಿ ಲೋಕಸಭೆ ಮತ್ತು ಅಸೆಂಬ್ಲಿ ಚುನಾವಣೆಗಳು ಏಕಕಾಲದಲ್ಲಿ ನಡೆದವು, ಆದರೆ 1968 ಮತ್ತು 1969 ರ ಆರಂಭದಲ್ಲಿ ಹಲವಾರು ಅಸೆಂಬ್ಲಿಗಳನ್ನು ವಿಸರ್ಜಿಸಲಾಯಿತು. ನಂತರ 1970ರಲ್ಲಿ ಲೋಕಸಭೆಯನ್ನೂ ವಿಸರ್ಜಿಸಲಾಯಿತು. ಹಾಗಾಗಿ ಒಂದು ದೇಶ, ಒಂದು ಚುನಾವಣೆ ಎಂಬ ಸಂಪ್ರದಾಯಕ್ಕೆ ಬ್ರೇಕ್ ಬಿದ್ದಿದೆ.
