ಸುದ್ದಿ ಕನ್ನಡ ವಾರ್ತೆ
ಕಾರವಾರ: ಉತ್ತರ ಕನ್ನಡ ಜಿಲ್ಲೆಯ ಯಾಣದ ಗುಹೆ ಹಾಗೂ ಬಂಡೆ ಕಲ್ಲುಗಳನ್ನು ಈಗ ಭಾರತದ ರಾಷ್ಟ್ರೀಯ ಮಹತ್ವದ ಭೂ-ಪರಂಪರೆ ಸ್ಥಳಗಳ ಪಟ್ಟಿಗೆ ಸೇರಿಸಲಾಗಿದ್ದು ಈ ಬಗ್ಗೆ ಅಧಿಕೃತ ಎಂದು ಘೋಷಣೆಯಾಗಿದೆ. ಗಣಿ-ಭೂವಿಜ್ಞಾನ ಮೂಲಕ ಭೂಗರ್ಭಸಮೀಕ್ಷಾ ಇಲಾಖೆ (ಜಿಎಸ್ಐ) ಈ ಸುದ್ದಿ ಹೊರಡಿಸಿದ್ದು ಯಾಣ ಈಗ ರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಿಕೊಂಡಿದೆ.
ಯಾಣದ ಗುಹೆ ಹಾಗೂ ಬಂಡೆ ಕಲ್ಲು ಕುಮಟಾ ತಾಲೂಕಿನ ಪಶ್ಚಿಮ ಘಟ್ಟಗಳ ಆಳವಾದ ಆರಣ್ಯದ ಮಧ್ಯೆ ಇದ್ದು ಉತ್ತರ ಕನ್ನಡ ಜಿಲ್ಲೆಯ ಕಟ್ಗಲ್ ಪರ್ವತ ಶ್ರೇಣಿಯಲ್ಲಿ ಇದು ಇದೆ. ಗೋಕರ್ಣಕ್ಕೆ ಸಮೀಪವಿರುವ ಈ ಸ್ಥಳವು ತುಂಬಾ ಪ್ರಸಿದ್ಧವಾಗಿದ್ದು ಇಲ್ಲಿ ಎರಡು ದೊಡ್ಡ ಏಕಶಿಲಾ ಬಂಡೆಗಳು ಎದ್ದು ಕಾಣುತ್ತವೆ. ಒಂದು ಭೈರವೇಶ್ವರ ಶಿಖರ ಇದು ಸುಮಾರು 120 ಮೀಟರ್ ಎತ್ತರದ್ದು, ಇನ್ನೊಂದು ಮೋಹಿನಿ ಶಿಖರ -90 ಮೀಟರ್ ಎತ್ತರ. ಇವು ಕಾರ್ಸ್ಟ್ ಲೈಮ್ ಸ್ಟೋನ್ (ಸುಣ್ಣದ ಕಲ್ಲಿನ) ರಚನೆಗಳು ಎಂದು ತಿಳಿದುಬಂದಿದೆ. ಆದರೆ ನೋಡುವವರಿಗೆ ಇವು ಕಪ್ಪು ಬಣ್ಣದ ಸ್ಪಟಿಕೀಯ ಬಂಡೆಗಳಂತೆ ಕಾಣುತ್ತವೆ. ಸುತ್ತಲಿನ ಹಸಿರು ಅರಣ್ಯದ ನಡುವೆ ಈ ಕಪ್ಪು ಬಂಡೆಗಳು ನಿಂತಿರುವುದು ಯಾರನ್ನು ಮಂತ್ರಮುಗ್ಧಗೊಳಿಸುತ್ತದೆ.ಇಲ್ಲಿ ಸುಮಾರು 60ಕ್ಕೂ ಹೆಚ್ಚು ಬಂಡೆ ರಚನೆಗಳಿವೆ ಎಂದು ಹೇಳಲಾಗುತ್ತದೆ. ಇವು ಲಕ್ಷಾಂತರ ವರ್ಷಗಳ ಹಿಂದೆ ರೂಪುಗೊಂಡವು. ಭೂವೈಜ್ಞಾನಿಕರಿಗೆ ಇದು ಒಂದು ದೊಡ್ಡ ಪ್ರಯೋಗಶಾಲೆಯಂತೆ.
ಪ್ರವಾಸೋದ್ಯಮ ಇಲಾಖೆಯ ಪ್ರಕಾರ ಈ ಭೂ-ಪರಂಪರೆ ಸ್ಥಳ ಘೋಷಣೆಯು ಮೂರು ದೊಡ್ಡ ಉದ್ದೇಶಗಳನ್ನು ಈಡೇರಿಸುತ್ತದೆ. ಮೊದಲನೆಯದು ಸಂರಕ್ಷಣೆ. ಈ ಅಮೂಲ್ಯ ಬಂಡೆರಚನೆಗಳನ್ನು ರಕ್ಷಿಸುವುದು. ಅರಣ್ಯವನ್ನು ಕಾಪಾಡುವುದು. ಎರಡನೆಯದು ಶಿಕ್ಷಣ. ವಿದ್ಯಾರ್ಥಿಗಳು, ಸಂಶೋಧಕರು ಇಲ್ಲಿ ಬಂದು ಭೂಗರ್ಭ ವಿಜ್ಞಾನ ಕಲಿಯಬಹುದು. ಮೂರನೆಯದು ಪ್ರವಾಸೋದ್ಯಮ. ಇದರಿಂದಾಗಿ ಹೆಚ್ಚು ಪ್ರವಾಸಿಗರು ಬರುತ್ತಾರೆ, ಸ್ಥಳೀಯರಿಗೆ ಉದ್ಯೋಗ ಸಿಗುತ್ತದೆ. ಯಾಣವು ಈಗಾಗಲೇ ಟ್ರೆಕ್ಕಿಂಗ್ ಮತ್ತು ಧಾರ್ಮಿಕ ಪ್ರವಾಸಕ್ಕೆ ಪ್ರಸಿದ್ಧವಾಗಿದೆ. ಈ ಘೋಷಣೆಯ ನಂತರ ಇನ್ನಷ್ಟು ಅಭಿವೃದ್ಧಿ ಆಗಲಿದೆ ಎಂದು ಎಲ್ಲರೂ ನಿರೀಕ್ಷಿಸುತ್ತಿದ್ದಾರೆ.
ಇದು ಕರ್ನಾಟಕಕ್ಕೆ ಮಾತ್ರವಲ್ಲ, ಇಡೀ ದೇಶಕ್ಕೆ ಹೆಮ್ಮೆಯ ವಿಷಯ. ಪಶ್ಚಿಮ ಘಟ್ಟಗಳು ಯುನೆಸ್ಕೋ ವಿಶ್ವ ಪರಂಪರೆ ಸ್ಥಳವಾಗಿದೆ. ಯಾಣವು ಅಲ್ಲಿಯ ಬಯೋಡೈವರ್ಸಿಟಿ ಹಾಟ್ ಸ್ಪಾಟ್ ಆಗಿದೆ. ಅನೇಕ ವರ್ಷಗಳಿಂದಲೂ ಸ್ಥಳೀಯರು ಇದನ್ನು ರಾಷ್ಟ್ರೀಯ ಸಹಜ ಪರಂಪರೆ ಸ್ಥಳವಾಗಿ ಘೋಷಿಸಬೇಕು ಎಂದು ಕೋರಿಕೆ ಸಲ್ಲಿಸುತ್ತಿದ್ದರು. ಈಗ ಆ ಕನಸು ಭಾಗಶಃ ಈಡೇರಿದಂತೆ ಆಗಿದೆ. ಜಿಎಸ್ಐಯು ಒಂದು ಪತ್ರದಲ್ಲಿ ಈ ಬಗ್ಗೆ ವಿವರಿಸಿದೆ ಎಂದು ತಿಳಿದುಬಂದಿದೆ. ಇದರಿಂದಾಗಿ ಪರಿಸರ ಸಂರಕ್ಷಣೆಗೆ ಹೆಚ್ಚು ಗಮನ ಸಿಗುತ್ತದೆ. ಬಂಡೆಗಳನ್ನು ಹಾನಿಗೊಳಗಾಗದಂತೆ ಕಾಪಾಡುವ ನಿಯಮಗಳು ಬರಲಿವೆ.
ನಮ್ಮ ಉತ್ತರ ಕನ್ನಡ ಜಿಲ್ಲೆಯವರಿಗೆ ಇದು ತುಂಬಾ ಹೆಮ್ಮೆಯ ವಿಷಯ. ಸಿರ್ಸಿ, ಕುಮಟಾ, ಗೋಕರ್ಣದಂತಹ ಪ್ರದೇಶಗಳಿಂದ ಬರುವವರಿಗೆ ಯಾಣ ಒಂದು ಅಚ್ಚುಮೆಚ್ಚಿನ ತಾಣ. ಇಲ್ಲಿ ಬಂದರೆ ಕೇವಲ ಬಂಡೆಗಳನ್ನು ನೋಡುವುದಲ್ಲ, ಪ್ರಕೃತಿಯೊಂದಿಗೆ ಒಂದಾಗುವ ಅನುಭವ ಸಿಗುತ್ತದೆ. ಮಳೆಗಾಲದಲ್ಲಿ ನೀರಿನ ಸದ್ದು, ಬೇಸಿಗೆಯಲ್ಲಿ ಹಸಿರು ಸೌಂದರ್ಯ ಪ್ರತಿ ಋತುವಿಗೂ ಯಾಣದ ಸೌಂದರ್ಯ ಬದಲಾಗುತ್ತದೆ. ಈಗ ರಾಷ್ಟ್ರೀಯ ಮಟ್ಟದ ಗುರುತು ಸಿಕ್ಕಿರುವುದರಿಂದ ಇನ್ನು ಮುಂದೆ ಇಲ್ಲಿ ಸುರಕ್ಷಿತವಾಗಿ, ಸುಸಂಘಟಿತವಾಗಿ ಪ್ರವಾಸೋದ್ಯಮ ಬೆಳೆಯಲಿದೆ.
ಈ ಘೋಷಣೆಯು ಭಾರತದಲ್ಲಿ ಇನ್ನಿತರ ಭೂ-ಪರಂಪರೆ ಸ್ಥಳಗಳಿಗೂ ಪ್ರೋತ್ಸಾಹ ನೀಡುತ್ತದೆ. ನಮ್ಮ ದೇಶದಲ್ಲಿ ಅಂತಹ ಅನೇಕ ಅದ್ಭುತ ಸ್ಥಳಗಳಿವೆ. ಆದರೆ ಯಾಣದಂತಹವುಗಳನ್ನು ಕಾಪಾಡುವುದು ನಮ್ಮ ಎಲ್ಲರ ಜವಾಬ್ದಾರಿ. ಪ್ರವಾಸಿಗರು ಬರುವಾಗ ಕಸ ತುಂಬಿಸದೆ, ಪ್ರಕೃತಿಯನ್ನು ಗೌರವಿಸುವಂತೆ ಮಾಡಬೇಕು. ಸರ್ಕಾರವೂ ಇದಕ್ಕೆ ಸಹಾಯ ಮಾಡಲಿದೆ ಎಂದು ಭರವಸೆಯಿದೆ. ಧಾರ್ಮಿಕ ಮಹತ್ವದ ಸ್ಥಳ.
ಈ ಸ್ಥಳಕ್ಕೆ ಧಾರ್ಮಿಕ ಮಹತ್ವವೂ ತುಂಬಾ ಇದೆ. ಭೈರವೇಶ್ವರ ಶಿಖರದ ಬುಡದಲ್ಲಿ ಭೈರವೇಶ್ವರ ದೇವಾಲಯವಿದೆ. ಶಿವಭಕ್ತರು ಇಲ್ಲ ಬಂದು ಪೂಜೆ ಸಲ್ಲಿಸುತ್ತಾರೆ. ಮೋಹಿನಿ ಶಿಖರವು ವಿಷ್ಣುವಿನ ಮೋಹಿನಿ ಅವತಾರಕ್ಕೆ ಸಂಬಂಧಿಸಿದ್ದು ಎಂದು ನಂಬಿಕೆಗಳಿವೆ. ಹಾಗಾಗಿ ಇಲ್ಲಿ ತೀರ್ಥಯಾತ್ರಿಗಳು, ಟ್ರೆಕ್ಟರ್ಗಳು ಮತ್ತು ಪ್ರಕೃತಿ ಪ್ರೇಮಿಗಳು ಎಲ್ಲರೂ ಭೇಟಿ ನೀಡುತ್ತಾರೆ. ಯಾಣಕ್ಕೆ ಹೋಗುವುದು ತುಂಬಾ ಸುಲಭ. ಸಿರ್ಸಿ ಅಥವಾ ಕುಮಟಾ ಮೂಲಕ ಬಸ್ ಅಥವಾ ವಾಹನದಲ್ಲಿ ಹೋಗಬಹುದು. ಅಲ್ಲಿ ಇಳಿದು ಸ್ವಲ್ಪ ಚಿಕ್ಕ ಟ್ರಿಕ್ ಮಾಡಬೇಕು. ಅರಣ್ಯದ ಹಾದಿಯಲ್ಲಿ ನಡೆಯುತ್ತಾ ಹೋದರೆ ಹಕ್ಕಿಗಳ ಸದ್ದು, ಗಾಳಿಯಲ್ಲಿ ಎಲೆಗಳ ಸುಸುವು, ಮತ್ತು ಆ ಬೃಹತ್ ಬಂಡೆಗಳ ದರ್ಶನ ಎಲ್ಲವೂ ಒಂದು ಅವಿಸ್ಮರಣೀಯ ಅನುಭವವಾಗುತ್ತದೆ. ಚಳಿಗಾಲದಲ್ಲಿ ಅಥವಾ ಮಳೆಗಾಲದ ನಂತರ ಹೋದರೆ ಇನ್ನೂ ಸುಂದರವಾಗಿರುತ್ತದೆ.
