ಸುದ್ಧಿಕನ್ನಡ ವಾರ್ತೆ
Goa: ಗೋವಾದ ಕುಡಚಡೆ ರೈಲ್ವೆ ನಿಲ್ದಾಣದ ಬಳಿ ಅನುಮಾನಾಸ್ಪದವಾಗಿ ಓಡಾಡುತ್ತಿದ್ದ ಅಜಿತ್ ಜೆನಾ ಎಂಬಾತನನ್ನು ಗಾಂಜಾ ಅಕ್ರಮ ಪ್ರಕರಣದಡಿಯಲ್ಲಿ ಬಂಧಿಸಲಾಗಿದ್ದು, ಪ್ರಮುಖ ಆರೋಪಿ ಅಕ್ಷಯ್ ಬಿಸ್ವಾಲ್ ನನ್ನು ಓರಿಸ್ಸಾ ದಲ್ಲಿ ಬಂಧಿಸಲಾಗಿದೆ. ಇದೀಗ ಈ ದಂಧೆಯ ಮೂರನೇ ಶಂಕಿತ ಮತ್ತು ಸರಕುಗಳನ್ನು ವಿತರಿಸುವ ವ್ಯಕ್ತಿ, ರಿಚು ಮಹೇಂದ್ರನ್ ಪಿಳ್ಳೈ (33, ಏಕೆ ಮಡಗಾಂವ್ ನಿವಾಸಿ) ಎಂಬಾತನನ್ನು ಪೋಲಿಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. .
ಪೋಲಿಸರು ನೀಡಿದ ಮಾಹಿತಿಯ ಅನುಸಾರ-ಕುಡಚಡೆ ರೈಲ್ವೆ ನಿಲ್ದಾಣದ ಹೊರಗೆ ಅನುಮಾನಾಸ್ಪದವಾಗಿ ಅಡ್ಡಾಡುತ್ತಿದ್ದ ಶಂಕಿತ ಅಜಿತ್ ಕುಮಾರ್ ಜೆನಾ (ಕುಬೇರ, ಓರಿಸ್ಸಾದ ಸ್ಥಳೀಯ) ಎಂಬಾತನನ್ನು ಕುಡಚಡೆ ಪೊಲೀಸರು ಬಂಧಿಸಿದ್ದಾರೆ. ಆತನನ್ನು ತಪಾಸಣೆ ನಡೆಸಿದಾಗ ಶಂಕಿತನ ಬಳಿ ಎರಡು ಚೀಲಗಳಲ್ಲಿದ್ದ 8.472 ಕೆಜಿ ಗಾಂಜಾ ವಶಪಡಿಸಿಕೊಳ್ಳಲಾಗಿದೆ. ಮಾರುಕಟ್ಟೆ ಬೆಲೆಯ ಪ್ರಕಾರ ಇದರ ಬೆಲೆ 8 ಲಕ್ಷ 47 ಸಾವಿರದ 200 ರೂ. ಎಂದು ಪೋಲಿಸರು ಅಂದಾಜಿಸಿದ್ದಾರೆ.
ಅಜಿತ್ ಜೆನಾ ಎಂಬ ಬಂಧಿತ ಆರೋಪಿಯ ವಿಚಾರಣೆಯಿಂದ ಶಂಕಿತ ವ್ಯಕ್ತಿ ಈ ಹಿಂದೆ ಗಾಂಜಾ ಸರಬರಾಜು ಮಾಡಲು ಗೋವಾಕ್ಕೆ ನಾಲ್ಕು ಬಾರಿ ಬಂದಿದ್ದ ಮತ್ತು ಓರಿಸ್ಸಾದ ವ್ಯಕ್ತಿಯೊಬ್ಬರು ಅವರಿಗೆ ಗಾಂಜಾ ಸರಬರಾಜು ಮಾಡುತ್ತಿದ್ದರು ಎಂದು ತಿಳಿದುಬಂದಿದೆ. ಶಂಕಿತ ಜೆನಾಗೆ ನ್ಯಾಯಾಲಯವು ಷರತ್ತುಬದ್ಧ ಜಾಮೀನು ನೀಡಿದೆ. 50,000 ಬಾಂಡ್ ಮತ್ತು ಅದೇ ಮೌಲ್ಯದ ಜಾಮೀನುದಾರರು, ವಸತಿ ವಿಳಾಸ, ಸಂಪರ್ಕ ಸಂಖ್ಯೆ ಮತ್ತು ಅನುಮತಿಯಿಲ್ಲದೆ ಗೋವಾದಿಂದ ಹೊರಹೋಗದಂತೆ ಷರತ್ತು ಬದ್ಧ ಜಾಮೀನು ವಿಧಿಸಲಾಗಿದೆ.
ಕುಡಚಡೆ ಪೊಲೀಸರು ತನಿಖೆ ಮುಂದುವರಿಸಿ ಶಂಕಿತ ಜೆನಾ ನೀಡಿದ ಮಾಹಿತಿ ಮೇರೆಗೆ ಓರಿಸ್ಸಾ ಮೂಲದ ಅಕ್ಷಯ್ ಕುಮಾರ್ ಬಿಸ್ವಾಲ್ (38, ಒಡಿಶಾದ ಭದ್ರಕ್ ನಿವಾಸಿ) ಎಂಬಾತನನ್ನು ಬಂಧಿಸಿದ್ದಾರೆ. ಶಂಕಿತ ಅಕ್ಷಯ್ ಕುಮಾರ್ ಸ್ವತಃ ಓರಿಸ್ಸಾದಿಂದ ಗೋವಾಕ್ಕೆ ಗಾಂಜಾ ತರುತ್ತಿದ್ದದ್ದು ಬೆಳಕಿಗೆ ಬಂದಿದೆ. ಆತನನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದಾಗ ಐದು ದಿನಗಳ ಕಾಲ ರಿಮಾಂಡ್ ನೀಡಲಾಯಿತು.
ಈ ಪ್ರಕರಣದಲ್ಲಿ ಕುಡಚಡೆ ಪೊಲೀಸರು ಮೂರನೇ ಆರೋಪಿಯನ್ನು ಬಂಧಿಸಿದ್ದಾರೆ. ಶಂಕಿತ ರಿಚು ಮಹೇಂದ್ರನ್ ಪಿಳ್ಳೈ ಓರಿಸ್ಸಾದಿಂದ ಮಾದಕ ದ್ರವ್ಯದ ಪಾರ್ಸೆಲ್‍ಗಳನ್ನು ತೆಗೆದುಕೊಂಡು ಹೋಗಿ ಗೋವಾದಲ್ಲಿ ಹಂಚುತ್ತಿದ್ದರು. ಈ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಆತನನ್ನು ಬಂಧಿಸಲಾಗಿದೆ. ಆರೋಪಿಯನ್ನು ನ್ಯಾಯಾಲಯ ಮೂರು ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿದೆ. ಓರಿಸ್ಸಾದಿಂದ ಗೋವಾಕ್ಕೆ ರೈಲು ಮೂಲಕ ಬಂದು ಡ್ರಗ್ಸ್ ಸಾಗಾಟ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ. ದಕ್ಷಿಣ ಗೋವಾ ಪೊಲೀಸ್ ವರಿಷ್ಠಾಧಿಕಾರಿ ಸುನಿತಾ ಸಾವಂತ್ ಅವರ ಮಾರ್ಗದರ್ಶನದಲ್ಲಿ ಕುಡಚಡೆ ಪೊಲೀಸರು ಇನ್ನೂ ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.
